اصد عنك وفي ضميري لك علوم ..........و تصد عني و انت عندك لي اخبار
عيني تشوفك عشر مرات في اليوم ............و تشوفني عينك من الوقت تكرار
اعرض بوجهي عنك واروح مهموم...........وتعرض بوجهك وانت نادم ومحتار
تبعد وانا اللي بك مكلف وملزوم..............وانا ابتعد و اترك ضميرك على نار
و الكل منا طيلة الوقت محروم ..................يروح دور و تنتهي عقبه ادوار
كن التفاهم بيننا البين معدوم .....................ما واحد صارح رفيقه بما صار
احباب ون صرنا سوى قوم من قوم............قلبي وقلبك من ورى سور وجدار
وتلوم نفسك مثلما نفسي الوم ..................مالك عذر وانا بعد مالي اعذار
اخشى نموت و حبنا سر مكتوم ...............مثل الجسد تحت الثرى دونه استار
ضعنا مع ليل سرى ماله نجوم ...............اظلم سمانا و انطفت فيه الانوار
حب طواه الصمت لا يمكن يدوم ................فيما بعد يصبح روايه و تذكار
الشوق يقلق راحتي حزة النوم ...............واروح في غبة هواجيس و افكار
وانا ادري انك بالمثل بس مقسوم .............هذا جزاء اللي حبهم كله اسرار
و افهم تراني منظلم وانت مظلوم .............و الظالم المظلوم دعواه تنهار
موضوع: حب طواه الصمت لا يمكن يدوم 
السبت أبريل 04, 2009 5:29 am
